第三次參加渣打全馬，經兩年的經驗，知到自已體能上的不足，經黃sir指示，今年有了針對性的訓練，都以長tempo為主，加強核心力量為輔，比賽前信心十足，sub330變成了最基本對自己的要求。
賽前兩日已休腳加炭，身體狀態理論上已回復到八九成，只係食得太多，感覺有啲重咗。不過朝早出門口行去西鐵站時已感到腳底足弓有少少酸痛，心知不秒。
為咗爭取好啲成績開段唔好俾人阻，尋晚到今朝都冇乜點飲水怕要搵厠所，就為咗今日早啲上線，所以冇咗上年開步幾畸要左閃右避嘅情況。開頭幾畸腳底足弓都keep住嗱住痛唯有寄望身熱完之後會唔痛啦，因為腳掌用唔到力，所以開段冇快放，亦未做到心目中435嘅配速，不過都冇心急，仲覺得夠熱身之後可以慢慢加速。
到上西九高架橋時隻錶突然自己停咗，再開始返已經唔知跑緊咩時間，唯有只係睇披醒做人。諗諗下，不如唔點睇錶去跑，放鬆啲仲好。今年上昂船州大橋感覺比上年辛苦，主因為足弓冇力，幾經辛苦先捱到橋頂！呀遠呢個時候跟咗上來，話點解咁慢，我仲話係專登忝，原來真係太慢了！
到10k叫henry報時，48分幾，個心涼咗一下，點解會咁慢？我心目中係應該做47分內先啱。知到慢咗咁唯有加番啲力喇，不過依然係唔急慢慢來。但對腳足弓越來越緊，跟本上俾唔到咩力，真激死！
半程睇大鐘時間1:41:4x，亦都比預期慢，不過算啦，都仲係最底目標之內。係呢段頭跟住個集團一路走到出西九，其中一個白衫紅褲披醒好定，我叫henry keep住跟佢，自已應該跟唔到落去，南昌水站同一眾同事打招呼之後我就跟甩咗，雙腿開始越來越實，足弓亦未見好轉，只能維持4分尾披醒落西隧。
上西隧時已經散晒，好彩呀遠仲係度有少少鼓勵性作用，佢有傷我腳亦唔妥，大家五五波，既然佢都得，自己都唯有死頂。到馬司道怕會抽筋，所以將速度放到好慢，細細步上細細步落，到駱克道跑半馬嘅同事番薯返到來，叫一叫我，咁唯有俾埋最後飲奶力去試下跟，但爆咗即係爆咗，冇以為計。
去到綠色地壇見大鐘係3:27:00，知到可以sub到330，咁就放鬆跑埋佢，過終點時大概係3:27:42。
總結：雖然係達標，但因足弓問題而未能發揮到最好表現，感覺有啲可惜，其實心裏藍圖係5k平均做24分內，尾段跌少少，咁大嘅可以3小時20完成，不過馬拉松實在太多變數，一來天氣濕度高，散熱難；二來估唔到足弓問題咁嚴重，影响都幾大。賽前仲估自己時間係328，不幸言中...
今年最成功係克服到抽筋嘅問題，就係出西隧有抽意都知點應變，呢樣係咁年最大嘅進步！