12年10月心臟病，之後醫生叫我慢跑鍛煉心肌（聽到醫生咁講，心諗自己從來不跑步，點算呀？），12月左右開始以行的速度慢跑，一圈後休息再跑，如是者勉強跑到兩三K，一星期跑兩三次，有五Ｋ已很多了，跑完次次肌肉都痛到爆炸咁，直至舊年參加渣加10K後先開跑得多了及用了MW的apps，見到一班師兄師姐，個個都咁勁，甚麽跑步傷膝，好似不合用咁。報了皇者半馬後就諗自己有機會跑到全馬，於是開始加強訓練，由期是跑扎山道，呢條路幫助到肌肉的耐力鍛煉，雖然期間操練的哩數唔算多，總算捱到完成，真係幾開心振奮。
原來約埋明哥同Leo等師兄一齊起步，熱完身就搵佢哋唔番，唯有早早上線等。跑了兩K睇錶13:45，嘩，原來跑得咁慢，之後就加點速，5K32分左右，都啱數，１0K係1.01.4，心想都不錯吧！喺上青馬橋前的斜路阿仔打電話嚟，傾咗一陣就被Leo過咗，原來佢沿途郊遊mode，不停自拍，但都快過我，講完電話都已不見了他的影，到18K遇到一鳴師兄，同佢吹一陣水，佢話頭段較慢，未發力過半馬後先衝，廿K左右一鳴發力，我就喺佢身後一路跟住跑，只係望住佢對燈色長襪一路擺動一路跟，發覺又幾順，仲可用鼻呼吸，又唔使煩，到出咗長青隧道後，約26K就唔見佢了，到30K 3:03:XX ，咦！好大機會四半內完成，西隧前已見好多人抽筋，自己雖未有跡象抽，但都喺隧道口噴咗的噴霧，隧道環境較暗焗熱同埋好嘈，到出口前打電話比阿仔報平安（因老婆同阿仔都擔心我跑跑下唔掂），跟住見到Leo過咗我，隧道內已爆了或者撞牆無法保持速度，之後到37K牌3:58:XX，仲有5K，如果有力四半還有望，可惜再無餘力，上完橋面落斜慢行咗一段，慢慢跑捱番終點，最尾兩K感覺十分漫長，好無盡感，最後勉強加點速衝埋佢。終於完成原來停下來的感覺好舒服，哈哈哈！賽後同一班MW內的朋友去飲茶非常爽！
其實賽前預咗跑到爆，唔用咁的心態跑就唔知自己的長力去到邊，原來可用6分速左右跑到30K。